In Titanas contra Iouem coniuratos
Tu dabis ęternas, proles Titania, poenas:
Sic eat in dominum qui uolet ire suum!
Haud docuit feritas sic te sęuire, Lycaon:
Vir fueras quando sanguinolentus eras.
Squamosus Phiton terra de matre creatus
Occubui telis, Phoebe superbe, tuis.
Hęc laurus quondam uirgo Peneia Daphne
In lauro mulier, ni latuisset, erat.
Isida nunc uocitant, pater Inacus Iona dixit:
Bosque fui Argoę tradita custodię.
Buccula sum, fueram uirgo dilecta Tonanti.
Idem sexus inest: Iuppiter, ergo ueni!
Inachidos si flamma tuę te, Iuppiter, urit,
Qualis ad Europam diceris isse, ueni.
Quo tibi, parue puer, Phoebei munera currus?
Excussus rapido, Phoeton, ab axe cades.
Phoetontis miseri fueramus, Pade, sorores.
Nunc populi ripę, maxime Pade, tuę.
Dum queritur Cignus fatum miserabile fratris,
Creuerunt plumę, mansit et albus olor.
Vrsus ista tibi, Iuno, non ursa Calisto
Fiat, ne rursum iuncta sit illa Ioui.
Quid nisi uerbosę dedit hoc petulantia linguę,
Corue, tibi? Niger es, qui prius albus eras!
Nigrior Idea nunc es pice, corue, sed idem
Sithonia fueras albior ipse niue.
Nata Coroneo spaciatur littora circum:
Vritur in mediis Ennosigeus aquis.
Nocte uolare pudor, cogit sat nota libido.
Nictei fueram filia Nictimene.
Ochiroę uati cęssit cortina Sybillę
Olli certa nimis, sed cecinisse nocet.
Hic lapis est index, sed si Cylenia furta
Desisset quondam prodere, Bathus erat.
Aglauros pretio noctem depecta sororis
Duruit et nullas saxea quęrit opes.
Cadme, iuuat patria iussis cęssisse paternis
Nobile Thebeę surgat ut urbis opus.
Mutantur animi: quę fratrum sanguine dextras
Polluerat, Cadmo gens ea fida fuit.
Heu, quantum uidisse nocet sine ueste Dianam:
Acteon canibus sum data pręda meis.
Tyresias quondam sexus expertus utrosque
Vno eodem fui foemina uirque modo.
Cęssit Iuno Ioui me iudice: lumine priuor,
Sed pro luminibus scire futura datur.
Arsit amans Echo Cęphiso flumine natum:
Nunc agit extremos deficiendo sonos.
Narcisus liquidis dum se speculatur in undis,
Nominis in florem uertitur ipse sui.
Cędunt iura mero: discerpsit Penthea mater
Ebria nec fratrem nouerat Ino soror.
Incubuit Tysbe pariter cui Pyramus ensi:
Causa necis miseris error amorque fuit.
Leucotoen miseram pater obruis, Orcame, terra
Nata sed e terra thurea uirga fuit.
Sol placuit Clitię. Sic nunc quo uertitur ille
Gaudet helitropium flectere facta caput.
Quam sit grande nefas pacti iuga soluere lecti,
Daphnidis Idei saxea fata docent.
Salmacis et Hermaphroditus
Dum fuit ignotus tibi, Salmacis, Hermaphroditus,
Simplicis hic sexus Hermaphroditus erat.
Mineides, Thebanę sorores
Facta est Mineis, dum despicit orgia Bacchi,
Nec uolucris nec mus, mus tamen et uolucris.
Contemptrix Iunonis erat mater Melicertę
In mare cum nato se furiosa dedit.
Eolides Athamas lustrans indagine siluas
Confixit natum: credidit esse feram.
Inoos comites eadem dum fata sequuntur
Non eadem accipiunt: hęc natat, hęque uolant.
Cadmus et Hermione deflebant fata nepotum
Fitque draco pariter Cadmus et Hermione.
Gorgonis hoc caput est quod Perseus abstulit harpe.
Hinc fuge: ni fugias, saxificatus eris.
Pegase, pasce tuo mea disticha fonte! Recusas?
At saltem lotio, Pegase, pasce tuo!
Athlas Iapetides stellarum torquet Olympum
Atque deos omnis sustinet unus Athlas.
Signifero forsan nunquam premeretur Olympo
Hospitium Perseo ni uetuisset Athlas.
Perseus Andromedes fertur pepigisse hymeneos
Atque hanc ęquoreis eripuisse feris.
Felix si cupidum nunquam fugisset amantem:
Angue foret nullo cincta Medusa caput.
Phineus Andromedes thalamos dum uendicat armis,
Protinus oblato Gorgonis ore riget.
Sero petis, Phineu, iunctam Cepheida Perseo:
Hanc prius a monstris eripuisse fuit.
Vt Polidectei riguerunt ilicet artus,
Hunc modo dum uicta Gorgone uictor adit!
Pyreneus e turri pręcipitatus
Castalidas uiolare meas fuge, si sapis; his qui
Struxerat insidias pręcipitando ruit.
Lęthifera ignoto propinabat pocula nato
Ęgeus: errori crimen inesse solet.
In scopulos Chirona tibi fuge, nauita, uersum:
Latro fuit nec adhuc non habet ille dolos.
Hęc patriam pretio Sithonia uendidit Arne:
Nunc aurum uolucris facta cupit rapere.
Magnum ne paruo natum mirere parente
Si formica potest ędere Mirmidonas!
Ardet amans Aurora, fugit te, Cephale, Procris:
Sępe solent tales necti ab amante doli.
Inuictumque canem cursu certamque sagittam
Ipsa suo Procris donat habere uiro.
Procri, mihi dederas nunquam fallentia tela
Hisque cadis. Quid sit fallere, Procri, magis?
Occidit Androgeus, pugnatur. Scylla capilli
Fata secat, Minos Attica regna capit.
Scylla patrem fugiens fugiebat plumea Cyris.
Pone sequens natam Nysus alietos erat.
Perplexum Labyrinthus iter, uarius Minotaurus.
Hoc est Pasiphes, Dedali at illud opus.
Thesea iuuit amor. Quem ni Minois amasset,
Dedalię fuerat pręda cibusque ferę.
Qui quondam sani spreuit pręcepta parentis,
Improbus Icarię nomina fecit aquę.
Pręceps aeria Perdix dimittitur arce
Circinus inuentum serraque cuius erat.
De Antheo ab Hercule superato
Antheus Herculea sublatus in aera dextra
Defecit: uictor, si cecidisset, erat.
De Męra, Proethi filia, a Ioue uitiata et a Diana interfecta
Cinthia, Proethidem quid curuo confodis arcu?
Parce, satis telum quod tulit illa Iouis!
Dux Herebi Pluton superas peruenit ad auras
Frugiferęque rapit pignora chara deę.
De hyrco conquerente se conuersum in utrem
Saturnus barbam, Pan plantas, cornua Bacchus
Abstulit. Hyrcus eram: nunc ego dicor uter.
Sic tibi dent, lector, mihi dii quę reddere nolunt:
Ne me despicias, sed miserere mei!