Sanctitas Vestra iam intellexit nostrum infelicem cum Thurca conflictum. Utinam non adeo audaces fuissemus ac non adeo in apertum periculum ruissemus temere! Sed ista quomodo cuius consilio vel quorum pocius temeritate sint acta, Vestra Sanctitas ex domino barone clarius intelliget, qui novit omnia, quę in hunc diem sciri potuerunt et quę a me scribi deberent. Ego ex hiis, que acta sunt, quę nunc aguntur, non possum aliud conjicere, nisi manifestum excidium huius patrię procul omni dubio. De me aliter constituerem, quam constitui, si que spes mihi superesset serviendi hic vel patrię vel Vestrę Sanctitati ac Sedi Apostolicę. Sed, cum utrunque mihi sit ademptum, faciam id cum gratia ac favore Vestre Sanctitatis, quod dominus baro referet Vestrę Sanctitati. De ipso domino barone, de obsequiis, quę Sedi Apostolici, Vestre Sanctitati, huic regno serviendo prestitit, non est opus, ut aliquid scribam. Non dubito Vestram Sanctitatem et servitiorum ipsius, quę prestitit, memorem futuram rationemque habituram et sortis miserę, in quam legatio ejus regno cadente incidit, miserturam una cum dominis meis observandissimis, sacro reverendissimorum patrum collegio.

Me, dominum baronem, mecum perpetuam servitutem in gratiam Vestre Sanctitatis humilime commendo. Quę felicissime valeat. Ex Posonio, X. Septembris 1526. Vestrę Sanctitatis miserimus servulus et capellanus Stepanus Brodericus pp cancellarius

Venit ad Vestram Sanctitatem vel cum domino barone vel non tarde post ipsum Statilius prepositus Budensis, secretarius regius bonus et sufficiens vir, nepos episcopi olim Vesprimiensis, bani Croacię32 a Thurcis interempti. Supplico, sit Vestrę Sanctitati commendatus, meretur aliquid vel memoria avunculi, tam boni servitoris religionis Christianę et Sanctę Sedis Apostolicę.