Author: Andreis, Franjo Trankvil 1490-1571Editor: Laszowski, Emilij2015-11-27
Credo tue reverende dominationi cognitos esse meos omnes casus usque ad reditum ex Constantinopoli. Quam primum veni in Hungariam rege adhuc extorre, subita et ancipiti egritudine corrui sumque morbo vexatus menses tres semper morti propior quam vite. Interim regia maiestas rediit ex Polonia; narravi necessitates tue reverende dominationis, quas et ipse noveram et tua reverenda dominatio perscripserat in literis, quas ad me dederat in Turciam. Regia maiestas iniquo animo tullit {infortuniam} tue reverende dominationis, propter temporum difficultates, ceterum affirmavit, se postea providisse tue reverendissime dominationi de expensis. Hoc eciam possum polliceri tue reverendissime dominationi, quod tua reverendissima dominatio amplificata dignitate auctisque fortunis reditura sit in Hungariam.
Regia maiestas aliquot in locis alit magnas copias, iam plerasque provincias subegit et arces expugnavit. Hic potentissimus princeps Turcus mittit regie maiestati in subsidium sex sanzachos et ipse cum validissimo {excercitu} contra hostes nostros adulto vere profecturus. Me huc venire mutatis equis adhuc imbecillem opportuit iussu regie maiestatis; his diebus octo credo me expeditum ex sentencia rediturum ad regiam maiestatem. Magnificus dominus Ludovicus Gritti strennue ac fideliter procurat negocia regia et ipse laturus est amplissimum fructum sue fidei atque laboris, quemadmodum puto intellexisse tuam reverendissimam dominationem ex literis, quas tua reverendissima dominatio proxime ad ipsum magnificum dominum Gritti misit. Ingens me cura invasit de reverendissimo domino Statilio et magnifico Rincone, oratore regis Frantie, si expediti sunt et quod nondum redierint; timeo, ne quid eis accident. Sed utinam deus nostras curas in melius mutet.
Radul wayvoda, omnium bipedum ingratissimus, a suis trucidatus est cum filio, cuius morte credimus fractos esse animos Transsilvanenses.
Reverendo domino, domino Iohanni Bonzano, preposito Varadiensi et oratori serenissimi domini Iohannis regis Ungarie ad excellentissimum dominum Venetorum, domino meo honorando.